Maikel Nabil Sanad

30 August 2010

خطاب لرئيس الوزراء فى رفض الخدمة العسكرية


عدا أكتر من شهر على أول جواب بعته لوزير الدفاع العجوز ( المشير محمد حسين طنطاوى – 75 عام ) ... و نظرا لأنة مكلفش نفسة بالرد على طلب من مواطن مصرى ، سواء بالقبول أو بالرفض ، حسب دورة كوزير يعنى ... فكان ضرورى آخد خطوة تانية بالتصعيد مع النظام المصرى
النهاردة أبتديت الخطوة التانية فى حملة الرسايل اللى هبعتها لمسئولين مصريين ، أطالب فيها بحريتى الفردية ، و بحقى فى رفض واعى من الخدمة العسكرية
و بما ان وزير الدفاع مردش ، فاللى بعدية فى التسلسل الوظيفى هو الدكتور أحمد نظيف رئيس مجلس الوزراء ... أنا عارف أنة فى الدول العسكرية اللى زى مصر ، وزير الدفاع بيتبع رئيس الدمهورية مباشرة ، و مش بيتبع رئيس الوزراء ، لكن أحنا ضرورى نلزمهم بالشكل المدنى اللى أحنا عايزينة ... يعنى ضرورى جنرالات الجيش يتعودوا أنهم ياخدوا أوامرهم من مدنيين منتخبين شعبيا

دة نص الرسالة اللى بعتها النهاردة الصبح لأحمد نظيف ( خبيت بس عنوان بيتى )




و دة أيصال البريد

و طبعا بعت نسخة من بطاقتى الشخصية ، و أستمارة ال 110 جند اللى بتثبت ترشيحى كظابط أحتياط بالجيش المصرى

و أنا فى أنتظار رد رئيس الوزراء ، و إن كنت لا أعتقد أن فية حد فى نظام يوليو العسكرى اللى بيحكمنا من 60 سنة ، هيهتم أنة يرد على مواطن مصرى

خطاباتى السابقة
يوميات ضابط بالجيش المصرى
لا للتجنيد الإجبارى



5 comments:

Anonymous,  30/08/2010 23:42  

انت مستنى تقديم اكتوبر؟

Maikel Nabil Sanad مايكل نبيل سند 31/08/2010 02:27  

لا ، أنا قدمت خلاص ، و المفروض ألبس ظابط فى 20 أكتوبر

Mahmoud Kefaya Punk,  31/08/2010 07:23  

انا شايف إن حتى لو ماجتش نتيجة, فحتبقى كسبت شرف العكننة على المستبدين.
بالتوفيق

Kontiki 31/08/2010 12:20  

اية دة الموضوع كبير :) دة انت مش رايح عسكرى لعلمك المادة 41 دى انا طبعتها من زمان الحرية الفردية فوق الجميع :) بس لو استثنوك حتفتح الباب لكل بنى ادم غير شريف ومعندوش نفس اسبابك انه يقدم طلب عشان ميخدمش فى الجيش وفى نفس الوقت مينفعش تبقى اختيارى لية عشان الحكومة مخلتش جوانا كتير عشان الشاب يتطوع عن اقتناع وحب لبلدة عشان يروح يتجند اختيارى !!!!!

Maikel Nabil Sanad مايكل نبيل سند 31/08/2010 13:29  

@Mahmoud Kefaya Punk
و هو دة المطلوب يا برنس

@Kontiki
أقوى جيوش العالم التجنيد فيها أختيارى .. اللى داخل بمزاجة هيحارب أحسن بكتير من اللى داخل غصب عنة
أنا عارف ان النظام المصرى قضى على أى وطنية فى قلوب الناس ... بس دة مينفيش ان لو فية مرتبات كويسة زى اللى بتتعطى لظباط الجيش و الشرطة ، فساعتها هيكون فيه متطوعين كتير

و شكرا على زياراتك المتتالية للمدونة يا قمر

Post a Comment

عبر عن رأيك بحرية من خلال خاصية التعليقات . تعليقك يشجعنى على الأستمرار
التعليقات المنشورة تعبر عن آراء أصحابها

Search

Add to Favorites

Share / Save

Share/Save/Bookmark

Recent Visitors

Site Counter

Share it

Alexa Rating

  © Blogger templates The Professional Template by Ourblogtemplates.com 2008

Back to TOP