Maikel Nabil Sanad

11 July 2008

درس فى التفكير العلمى


نشرت جريدة ( شيت ) التى تعد أكبر الجرائد العلمية الأمريكية فى عددها الصادر فى سبتمبر الماضى أستطلاعا للرأى طرحتة على جميع العلماء و الباحثين .... و قد كان موضوع الأستطلاع يدور حول أذا ما كانوا يرون أن هناك أصلاحات أو تطويرات أو أضافات يرون أن جسم الأنسان يحتاجها .... و رغم مرور ما يقرب من العام على نشر هذا الأستطلاع ألا أن جميع الباحثين و العلماء فى الولايات المتحدة الأمريكية لم يردوا على هذا الأستطلاع ، و لهذا أضطرت الجريدة أن تجرى لقاء مع العالم الكبير ( بيج لاى ) أستاذ الأيروتيكا بجامعة ألاسكا الأستوائية و سألوة عن رأية فى إحجام العلماء عن التعليق على هذا الأستطلاع .... و قد كان رد العالم الكبير مفاجئا لهم ، أذ قال : " لا تنتظروا أن يجيبكم أحد ، أنا أدرس جسد الأنسان منذ أكثر من 70 عاما و حصلت على أكثر من خمس رسائل دكتوراة فى علوم طبية مختلفة ، و مع ذلك أكاد أجزم بكل علمى أن جسد الأنسان كامل ولا عيوب بة ، ولا يحتاج أى تطوير أو أضافات أو تعديلات "

تعالوا نشوف الناس هاتتعامل مع الخبر دة أزاى :

واحد مسيحى : ( و هو بيرشم الصليب ) هلليلويا ... مجدا ليسوع ... المجد لله فى الأعالى ... قدوس أنت يا الله ، ما أعجب عظائمك يا رب

واحد مسلم : ( و هو بيسجد فى أتجاة القبلة ) اللة أكبر .... سبحان الله .... ( مش عارف المسلمين بيقولوا أية كمان )

واحد بيفكر تفكير علمى : هيسأل نفسة
1- هل فعلا فية جريدة أسمها ( شيت ) ؟
2- و هل هى فعلا جريدة علمية ؟
3- هل هى فعلا أكبر الجرائد العلمية الأمريكية ؟
4- و الجريدة دى سنوية ولا شهرية ولا يومية ؟ و هل ليها فعلا عدد صدر فى سبتمبر الماضى ؟
5- هل فعلا نشروا أستطلاع رأى بالشكل دة ؟
6- و أذا كانوا فعلوا نشروا الأستطلاع دة ، فهل فعلا محدش بعتلهم رد ؟
7- طيب هل الناس مابعتتش رد لأن الجريدة مش مشهورة ، أو لأن الأستطلاع أتنشر فى مكان غير ظاهر فى الجريدة ، أو لأن تكلفة البريد كبيرة فى بلادهم ، أو لأن الناس مش بتحب التعامل مع أسرة تحرير الجريدة دى أو لأى سبب تانى غير السبب المنشور ؟
8- هل فعلا فية شخص أسمة ( بيج لاى ) ؟ و هل هو فعلا أستاذ فى الجامعة اللى قالوا عليها ؟
9- هل فعلا فية جامعة أسمها جامعة ألاسكا الأستوائية ؟ و أذا كانت موجودة ، هل هى معترف بيها دوليا ولا لأ ؟
10- يعنى أية أستاذ فى الأيروتيكا ؟ و دى أية علاقتها بموضوع الأستطلاع ؟
11- هل فعلا الراجل دة أخد 5 رسايل دكتوراة ؟ طيب و موضوعاتهم كانت فى أية ؟
12- هل فعلا الراجل دة بيدرس لية 70 سنة ؟ ولا هيطلع عندة 20 سنة ؟
13- و حتى لو كان عالم فعلا ممكن يكون غلطان ، يعنى برضة ضرورى نفكر فى كلامة ... هل فعلا جسد الأنسان مش محتاج تطوير ؟ يعنى أحنا مش محتاجين مثلا شوية مناعة ضد الأنفلونزا و السرطان و الأيدز و فيرس سى و باقى الأمراض اللى بتطلع عنينا ؟

ملاحظات أخيرة
1- أسم الجريدة شيت = خراء
2- أسم العالم بيج لاى = كذبة كبيرة
3- الأيروتيكا هو فن العرى
4- لا توجد جامعة أسمها جامعة ألاسكا الأستوائية
5- هذا الخبر من تأليفى

يمكن الشخص اللى بيفكر تفكير علمى بيقولوا علية معقد علشان بيسأل أسئلة كتيرة و مش بيصدق حاجة بسهولة .... بس لو فكرتوا فيها هتلاقوا أنة عندة ميزة مش عند أى حد تانى .... أنة مش بينضحك علية بسهولة

3 comments:

أسامة,  29/07/2008 20:57  

حلو أوي موضوع ألاسكا الاستوائية ده
المشكلة ان اللي بيفركوا أخبار زي دي بيعتمدوا على الإبهار عشان يخلوا الواحد مايفكرش
ده بالاقيه عندنا كتير في الجماعة الإعجازيين (بتوع الإعجاز في القرآن والسنة) ، ومش عارف إذا كان عندكم زيهم
تلاقي الواحد منهم بيعلن خبر إسلام أحد أكبر علماء الغرب في تخصص كذا لأنه اكتشف كذا ووجد ان الكلام ده مكتوب في القرآن من أربعتاشر قرن
طبعا فبركة أسامي العلماء والجامعات مافيش أسهل منه زى ما وضحتلنا بالظبط
ولو الواحد فكر بأسلوب علمي زي ما انت عملت هايلاقي في كل كلمة غلطة
يعني مثلا لما زغلول النجار روج لموضوع النجم الطارق (ودي آية في القرآن الكريم)، وقال ان فيه نجوم في الفضاء بتصدر نبضات عاملة زي الطرقات على الباب ، وان وكالة ناسا قدرت تسجل الطرقات دي
كلام مبهر جدا
المشكلة انه هش جدا جدا جدا جدا
ألف باء فيزياء
الصوت لا ينتقل في الفراغ
وطبعا الموضوع ليه ردود مفضلة بترد عليه


شكرا يا مايكل

Maikel Nabil Sanad مايكل نبيل سند 30/07/2008 04:54  

لا متخفش
عندنا من النوعية دى كتير
المسلمين و المسيحيين فى مصر بيعملوا نفس الحاجات ، بس مش بياخدوا بالهم .... و يمكن مش بياخدوا بالهم لأنهم خايفين ياخدوا بالهم

دلوقتى بقينا بنسمع عن الأعجاز العلمى فى الكتاب المقدس
فين أيامك يا جاليليو ؟؟

تحياتى

Khaled Khalil 09/08/2009 11:36  

واحد مسيحى
XOR
واحد مسلم
XOR
واحد بيفكر تفكير علمى

?

Post a Comment

عبر عن رأيك بحرية من خلال خاصية التعليقات . تعليقك يشجعنى على الأستمرار
التعليقات المنشورة تعبر عن آراء أصحابها

Search

Add to Favorites

Share / Save

Share/Save/Bookmark

Recent Visitors

Site Counter

Share it

Alexa Rating

  © Blogger templates The Professional Template by Ourblogtemplates.com 2008

Back to TOP